KANIYA JIYANÊ
ez
dengvedena şikeftên xewle me
hechecikan di hinavên xwe de
dihewînim
li cih û warên kavilbûyî
hatim dinyaya virek
li bêhtengiya şevên kambax
têm guvaştin
di taya xemên bêxewiya xwe de
diperitim
serê xwe datînim serçoka bîranînan
û kûr kûr diponijim
çîçekên bax û gulîstanan
berfîna quntarên çiyayan
gulgenimên zeviyan
pelên dara zeytûnê
dipişkivînim
û bi keskesorên aso şên dikim
ez
teyrê zinarên serhildêr im
baskên xwe ber bi aramiyê ve
diçirpînim
rêhevalê dostên bargiran im
tûrikê xwe bi êş û janên serfiraziyê
dadigirim
ji pêsîrên kaniya jiyanê
şîrê serhildanê dimijim
gemara rûyên cîhanê
bi agirpêta rondikên ferişteyan
dişom
li kêfxweşiya qedeha meyê
hest û xeyalên kulek
direqisînim
li ber dergehên giyan
bi mirina bêwext re govendê
digerînim
stêrka hingûra êvarên dilteng
di nûraniya rûyê bedewekê de
dibiriqînim
ez
mizgîniya xêra rojên geş im
serbestiya diyarên welatê bindest im
tifinga tolhildanê
ber bi armanca rizgariyê ve
diteqînim
li heyveroniya demsalan
tovên berxwedanê li Efrîna delal
direşînim
bi felsefeya ramanên ronî
naletê li dîroka çaxên genî
dibarînim
Xizan Șîlan
2018-02-14
Stockholm
