ȘEVÊN LAL / Xizan Şîlan

1
866 views

ȘEVÊN LAL

ez

nexşa sînorên welatekî

parçebûyî me

di hîleyên kezebreşan de

hatim kuştin

mirina min ji mirina xwe

şerm kir

darbestên mesûm

bi îskeîsk rondikên xeman

barandin

kefenan li eniyên xwe reş

girêdan

goristanên bêxwedî nalenal in

meleyên perestgehan

duayên nimêja xwe ji bîr kirin

êş û janeke bişewat

kete qolinca seyrangehan

heyvê porê serê xwe

rûçikand

gerstêrkan

rêgeha xwe winda kirin

bîranînên şêrîn

kezeb li xwe peritandin

çûkên serê sibehê

di wîçewîça hêrsa xwe de

qirik li xwe dirandin

kevirên qûntara çiyayên asê

serî hildan

ji ber derd û kulên dinyayê

erd û asîman lerizîn

tirsê

zirav li berbangan qetand

li bêxewiya şevên lal

xwêdana laşê helbestê

radimûsim

ez ê

tifa gazin û lomeyan

bipijiqînim  ser rûyê xêrnexwezan

bi qêrîneke serxweş

perdeya guhên cîhana ker

veçirînim

tevna qedera bajarên hilweşiyayî

ji nû ve bihûnim

gustîlka dergîstiyê têxim

tiliya bûka şaristaniyê

bi tilîliyan govenda serkeftinê

bigerînim

û destmala şahiya keç û xortan

bihejînim

hêviyê li bejna pêşeroja ronî

bipêçim

tovên aramiyê

li ser axa welatê keserkêş

bireşînim

baskên kevoka xeyalên xwe

ber bi asoya azadiyê ve

biçirpînim

ji kaniya sewdayê araqa şadiyê

binoşim

dergûşa dilê perpitî

bi şîrê rojê bimijînim

di newalên ziwa re ava kewserê

biherikînim

li ser pişta xwe tûrikê dilovaniyê

bigerînim

û ez ê

sifreya sebir û xweşbîniyê

li ber her kesî raxim

 

 

Xizan Șîlan

2018-04-01

Stockholm

0 0 vote
Article Rating
Subscribe
Bildir
guest
1 Yorum
Oldest
Newest Most Voted
Inline Feedbacks
View all comments
Şoreş Reşî
Sores
2 yıl önce

Deste ne esin mamoste Xizan, mala te awa Keko, EM dil bi kulin ve helbeste derde min zede kirin. Serkeftin mirove dilpaq!